Гүйцэтгэх Зөвлөл Ерөнхий бага хурлыг бэлтгэн явуулж, Ерөнхий бага хурлын шийдвэрүүдийг хэрэгжүүлдэг. Гүйцэтгэх Зөвлөлийн 58 гишүүнийг Ерөнхий бага хурлаар сонгодог. Гүйцэтгэх Зөвлөл жилд хоёр удаа хуралдаж, хөтөлбөрүүдийн хэрэгжилт, төсвийг хянадаг. Гүйцэтгэх Зөвлөлийн гишүүдийг дэлхийн газарзүйн бүс нутгуудын төлөөлөл аль болох тэнцвэртэй оролцсон байхаар сонгодог.

Монгол Улс Ази, Номхон Далайн буюу IV бүлэгт (ASPAC) харьяалагддаг. Энэ бүлэгт 41 улс байдаг бөгөөд Гүйцэтгэх Зөвлөлд 12 суудалтай. Гишүүн улсуудын Байнгын төлөөлөгч нар бүс нутгийн бүлгээр ЮНЕСКО-гийн Төв байранд байнга хуралдаж, Гүйцэтгэх Зөвлөлийн хуралдаанаар баримтлах байр сууриа нэгтгэж байдаг нь байгууллагын удирдлагад оролцох нэг хэлбэр болж байдаг юм. 

Монгол улс ЮНЕСКО-гийн Гүйцэтгэх Зөвлөлийн гишүүнээр сонгогдсон нь

• Монгол улс ЮНЕСКО-гийн Гүйцэтгэх Зөвлөлийн гишүүнээр 1983-1987 онд анх удаа сонгогдон ажиллав.
• Монгол улс ЮНЕСКО-гийн Гүйцэтгэх Зөвлөлийн гишүүнээр 2007-2011 онд 20 жилийн дараа хоёр дахь удаагаа сонгогдон ажиллаж байна. Монгол улсын засгийн газрыг төлөөлж Л. Эрдэнэ - Очир ЮНЕСКО-гийн Гүйцэтгэх Зөвлөлийн гишүүнээр ажиллаж байна.